هاشلة بربارة... مع بنات الحارة... عرفتا من... عينيها

Category: In the Spotlight New
Hits: 56

INT-barb

هاشلة بربارة... مع بنات الحارة... عرفتا من عينيها...

كلّ المعرفة بالعيون. يمكن لأنّو العيون بتحكي لغّة القلب وما بتقدر تخبّي، لهالسّبب بتظهر فيهن كلّ الحقيقة. وهيك بقيت عيون تلاميذ القسم المتوسّط عم تلمع فرح وبراءة من خلف الأقنعة والألوان اللّي غطّت وجوهن لكن ما قدرت تخفي حقيقتن بهالعيد المبارك.

للإحتفال بعيد القدّيسة بربارة، استقبلنا باليوم اللي بيسبق العيد، تلاميذنا الزغار من قسم ما قبل المدرسة. وصلوا بمراويلن الحمرا وأقنعتن الزغيرة وسلال الخير بإيدَين معلّماتن، زقفوا وغنّوا ودقّوا.

وأهم شي إنُّن اندهشوا باللي عم يصير من هيصة التلاميذ الكبار وفرحهن فيون.

وبيوم العيد وصلوا تلاميذنا عالمدرسة متنكّرين وبلّشت الإبتسامات تنرسم على وج كلّ واحد بيلتقي فيون بالقسم، وحتّى اللّي ما كان لابس زيّ تنكّري قال إنّو هوّي اليوم متنكّر بشكل تلميذ وشارك بالفرح ع طريقته.

وبين الأقنعة والألوان والأزياء التّنكّريّة، عرفوا تلاميذنا يحافظوا على جدّيّتن بساعات التّعليم متل ما حافظوا على الشّخصيّات اللّي لابسينها بساعات الفرص ووقت المباراة، اللّي انتهت بتوزيع الشّهادات والصّور والحلويات على الرّابحين لأفضل زي وأحلى فكرة.

تمنّياتنا للجميع، بشفاعة القدّيسة بربارة إنّو نعرف، بحياتنا اليوميّة، نتخلى عن كلّ الأقنعه المزيّفة تنلبس وجّ يسوع.

وعقبال كلّ سنة.

00-facebook